Shavkat Mirziyoyev Saudiya Arabistoni valiahd shahzodasi bilan telefon orqali suhbatlashdi

29-mart kuni Oʻzbekiston Prezidenti Shavkat Mirziyoyev Saudiya Arabistoni Valiahd shahzodasi, Vazirlar Kengashi Raisi Muhammad bin Salmon Al Saud bilan telefon orqali suhbatlashdi.

Suhbat boshida tomonlar Ramazon hayiti — Iyd al-Fitr bayrami munosabati bilan bir-birini tabrikladilar.

Suhbat davomida Yaqin Sharqdagi vaziyatning yomonlashuvi va mintaqada kuchayib borayotgan taranglikka oid jiddiy tashvish bildirildi. Rahbarlar vaziyatning yanada keskinlashishining oldini olish va to'liq yechimga erishish nafaqat mintaqadagi mamlakatlar manfaatlariga, balki global barqarorlikni ta'min etish vazifalariga ham xizmat qiladi, deb ta'kidladilar.

O'zbekiston rahbari hozirgi sharoitda respublikamiz Saudiya Arabistoni rahbarligi va xalqiga hamjihatlik bildirib, Shohlik yuritayotgan muvozanatli siyosiy kursni qo'llab-quvvatlayotganini ta'kidladi.

Prezident, shuningdek, Saudiya Arabistonida bo'lgan O'zbekiston fuqarolariga umra marosimlarini ado etishlari uchun yordam bergani va qulay sharoitlar yaratgani uchun podshoh Salman bin Abdulaziz Al Saudga va voris shahzodaga minnatdorchilik bildirdi.

O'z navbatida Muhammad bin Salmon O'zbekiston rahbarining do'stona munosabatini va qo'llab-quvvatlashini yuqori baholayotganini ta'kidladi. Suhbat yakunida tomonlar ikki tomonlama va ko'p tomonlama hamkorlikni yanada rivojlantirish maqsadida eng yuqori darajada aloqalarni faollashtirish va sa'y-harakatlarni muvofiqlashtirish bo'yicha kelishib oldilar.